ដីសើមបឹងស្នេហ៍ ជាជម្រកសត្វស្លាបរាប់លានក្បាល

ខេត្តព្រៃវែង. តំបន់ដីសើមបឹងស្នេហ៍ មាន​ចម្ងាយ​ប្រមាណ១៥​គីឡូម៉ែត្រ​ពី​ក្រុងព្រៃវែង ដែលស្ថិតនៅក្នុងភូមិបឹងស្នេហ៍ ឃុំធាយ ស្រុកបាភ្នំ ខេត្តព្រៃវែង គឺជាកន្លែងប្រភពទឹកសម្រាប់ឃុំប្រមាណ១៤ ដើម្បីឲ្យប្រជាពលរដ្ឋធ្វើស្រែប្រាំង និងក៏ជាតំបន់មានប្រព័ន្ធអេកូឡូស៊ីដែលក្លាយជាជម្រកហ្វូងសត្វស្លាបចម្រុះរាប់លានក្បាលដូចជា ស្មោញ ទុងប្រផេះ រនាលណ៍ ត្រយ៉ងខ្លួនស ត្រដក់តូច ពិសេសចង្កៀលខ្យង ទុង ក្រសារ កុក ខ្វែក ក្អែកទឹក និង​សំបក​ត្រពាំង​ជាដើម។

បន្ទាប់ពីតំបន់ដីសើម​បឹង​ស្នេហ៍ បាន​ក្លាយ​ជា​ជម្រក​សត្វ​ស្លាប​កម្រ​ជា​ច្រើន​ប្រភេទ និងទាក់ទាញភ្ញៀវទេសចរណ៍ជាតិ-អន្តរ​ជាតិកាន់តែច្រើនឡើងៗមក តំបន់នេះបានបង្កើតជាតំបន់អភិរក្ស កាលពីឆ្នាំ២០១២។ បច្ចុប្បន្ននេះអាជ្ញាធរ​បាននាំគ្នាអភិរក្ស​ព្រៃ​លិច​ទឹក​នៅ​តំបន់​នោះ ដោយមានការចូលរួមពីប្រជា​សហគមន៍​នៅ​តំបន់​បឹង​ស្នេហ៍​ដែល​ស្ថិតនៅក្នុង​គម្រោង​អភិរក្ស​របស់​អង្គការ​នារី​អភិវឌ្ឍន៍​សេដ្ឋកិច្ច និង​អនាម័យ (ហៅសាមញ្ញថា អង្គការ Women)  និងមន្ត្រី​ជំនាញ​ពាក់ព័ន្ធ​ក្នុង​ខេត្ត។ នៅកណ្តាល​បឹង​ស្នេហ៍ មាន​ផ្ទៃដី​ព្រៃ​លិច​ទឹក​ប្រមាណជាពី៨៥ ទៅ ១០០ហិកតា ដែល​អ្នក​ភូមិ​ហៅ​ថា ទួលព័ន្ធតាឡី។

ពេលខ្លះក៏មានបញ្ហាកើតមានឡើងនៅតំបន់ដីសើមបឹងស្នេហ៍ដែរ គឺសត្វ​ស្លាប​ត្រូវ​គេ​លួច​ចាប់​នៅពេល​យប់ ដោយសារ​សហ​គមន៍​ពុំ​មាន​ឧបករណ៍ និង​បុគ្គលិក​គ្រប់គ្រាន់​សម្រាប់​ដើរ​ល្បាត។ ចំនួន​សត្វ​ស្លាប​ថយ​ចុះ​គួរ​ឲ្យ​កត់សម្គាល់ ហើយ​ពពួកសត្វចង្កៀល​ខ្យង ទុង ក្រសារ បាន​ផ្លាស់​ទី​ចេញពី​តំបន់​នោះ​ស្ទើរ​អស់ ក្នុងករណី​ឆ្នាំ​ណាដែល​ទឹកតូច​ដី​នៅ​ទំនេរ​ច្រើនងាយស្រួល​ក្នុង​ការ​ចល័ត​ទីតាំង​រក​ចំណី​របស់សត្វស្លាបទៅ​កន្លែងផ្សេង​ៗ គួប​ផ្សំ​នឹង​មានការ​បរបាញ់​ពី​ជនខិលខូច​មួយ​ចំនួន ធ្វើ​ឱ្យ​វា​ភ័យ​ខ្លាច។

ដោយសារតំបន់ដីសើមបឹងស្នេហ៍ ជាជម្រកប្រភេទសត្វស្លាបជាច្រើនប្រភេទ ពិសេសសត្វស្លាបមួយចំនួនជិតផុតពូជ និងកំពុងរងការគំរាមកំហែងនៅលើពិភពលោកដូចជា ស្មោញ ទុងប្រផេះ រនាលណ៍ ត្រយ៉ងខ្លួនស ត្រដក់តូច ពិសេសចង្កៀលខ្យង ដែលកំពុងបន្តពូជពងកូនរាប់ពាន់កល្បាល នៅចំណុចទួលព័ន្ធតាឡី (ក្នុងតំបន់ដីសើមបឹងស្នេហ៍) ព្រមទាំងដើម្បីលើកកំពស់ជីវភាព-អភិវឌ្ឍសហគមន៍មូលដ្ឋាន ប្រើប្រាស់ដោយនិរន្តភាពនូវធនធានធម្មជាតិ និងការពារធនធានធម្មជាតិ ទើបកាលពីថ្ងៃព្រហស្បតិ៍ ទី២៦ ខែធ្នូ ឆ្នាំ២០១៩ ថ្នាក់ដឹកនាំក្រសួងបរិស្ថាន និងអាជ្ញាធរខេត្តព្រៃវែង បានបើកកិច្ចប្រជុំពិគ្រោះ​យោ​​បល់ថ្នាក់ខេត្តស្តីពី ការដាក់បញ្ចូល​តំបន់ដីសើមបឹងស្នេហ៍នេះ ជាតំបន់ការពារធម្ម​ជាតិ​៕

អត្ថបទដោយ រក្សា  ខ្មែរ

សហគមន៍សម្បូរសប្បាយ

The post ដីសើមបឹងស្នេហ៍ ជាជម្រកសត្វស្លាបរាប់លានក្បាល appeared first on សហគមន៍សម្បូរសប្បាយ (ស៣).

ប្រភព៖ សហគមន៍សម្បូរសប្បាយ (ស៣)