ការធ្វើទ្រុងពពែ៖ ទ្រុងសង់ផ្ទាល់ដី ទ្រុងសង់ផុតពីដី និងធ្នើរឬទ្រុងសំរាប់ដាក់ស្មៅ

៤. ទ្រុង

ទ្រុងដែលល្អមានសារៈសំខាន់៖

ពពែផ្តល់ល័ក្ខខ័ណ្ឌល្អសំរាប់ការរស់នៅដល់សត្វ និងធ្វើឲ្យសត្វមានសុខភាពល្អ

  • ការពារសត្វពពែ ជាពិសេសកូនរបស់វា។

សំភារៈដែលងាយរកសំរាប់សាងសង់ទ្រុងពពែរួមមាន៖

  • ឈើសំរាប់ធ្វើសសរ និងជើងសសរសំរាប់ទ្រកុំឲ្យពុក
  • រនាប​ ឬក្តារបន្ទះសំរាប់ក្រាលបាត ជញ្ជាំងអាចធ្វើពីឫស្សី ឬបន្ទះឈើតូចៗ
  • ដំបូលអាចប្រក់ស្លឹកត្នោត ឬស្លឹកស្បូវក្រងជាកណ្តាប់
  • ដែកគោលសំរាប់ដំភ្ជាប់រនាប​និងជញ្ជាំង។ល។
  • ដែកលួសសំរាប់ចងភ្ជាប់ផ្សេងៗ។ល។

យើងអាចចែកទ្រុងជាពីរប្រភេទ៖

  • ទ្រុងដែលសង់ផ្ទាល់ដីនិង
  • ​ទ្រុងសង់ផុតពីដី។

៤.១. ទ្រុងពពែដែលសង់ផ្ទាល់ដី

ទ្រុងដែលសង់ផ្ទាល់ដីវាសមស្របទៅនឹងតំបន់ស្ងួត វាងាយស្រួលក្នុងការសង់​ និងដោយត្រូវការរបងព័ទ្ធជុំវិញ។ដីបាតទ្រុងលើកឲ្យមានកំពស់ប្រហែល ៣០សង់ទីម៉ែត្រ និងធ្វើឲ្យមានជំរាលបន្តិច។ធ្វើយ៉ាងនេះងាយស្រួលក្នុងការបង្ហូរកាកសំណល់ លាមក និងទឹកនោមចេញក្រៅ ហើយដែលអាចរក្សាទ្រុងស្ងួតជាប្រចាំ។

ក្នុងការសង់ទ្រុងប្រភេទនេះកសិករអាចប្រើសំភារៈដែលមានក្នុងភូមិដូចជា កូនឈើ ឫស្សី ក្តារបន្ទះហើយដំបូលប្រក់ស្លឹក។ល។

៤.២. ទ្រុងពពែដែលសង់ផុតពីដី

ការសាងសង់ទ្រុងបែបនេះទាមទារការពិនិត្យបានល្អិតល្អន់ និងត្រូវការសំភា​រៈសាងសង់ច្រើន​ក៏ប៉ុន្តែវាមានលក្ខណៈងាយស្រួលដែរក្នុងការសាងសង់។កំពស់របស់ទ្រុងប្រហែល ១ម៉ែត្រពីដី សត្វពពែអាចឡើងទៅលើទ្រុងតាមជណ្តើរជំរាល ជណ្តើរឡើងត្រូវសង់ឲ្យមានបង្កាន់ដៃដើម្បីការពារកុំឲ្យសត្វធ្លាក់។ពពែរស់នៅដោយសុខស្រួលក្នុងទ្រុងប្រភេទនេះ វាជាសត្វដែលចូលចិត្តទ្រុងបែបនេះ ហើយដែលធ្វើឲ្យវាលូតលាស់ល្អ និងផ្តល់ផលខ្ពស់ ពីព្រោះទ្រុងប្រភេទនេះមានសារៈប្រយោជន៍ច្រើន ការពារសត្វពពែពី៖

  • ភ្លៀង ខ្យល់ខ្លាំង និងកំដៅព្រះអាទិត្យខ្លាំង
  • ការចំលងមេរោគ និងជំងឺ
  • ចោរលួច និងសត្វព្រៃ។

សារៈសំខាន់ផ្សេងទៀត៖

  • ខ្យល់ចេញចូលល្អ
  • ងាយស្រួលក្នុងការសំអាត
  • ងាយស្រួលក្នុងការប្រមូលលាមក និងផ្តល់លាមកល្អ។

អាស្រ័យហេតុនេះទ្រុងដែលសង់ផុតពីដីនាំមកនូវគុណសម្បត្តិសំខាន់ៗដូចជា៖

  • ទ្រុងផ្តល់នូវភាពស្ងួត និងធ្វើឲ្យពពែមិនរងា
  • ធ្វើឲ្យចំណីស្អាតមិនប្រឡាក់ ស្ងួត និងមានរសជាតិ ហើយដែលចំណីមិនសល់ចោល
  • ផ្តល់នូវម្លប់ដ៏ត្រជាក់ និងការពារសំណើមហើយធ្វើឲ្យសត្វចង់ស៊ីចំណី
  • កាត់បន្ថយពីការលួច និងកាត់បន្ថយពីការបំផ្លាញដោយសត្វព្រៃ។

ទ្រុងដែលសង់ផុតពីដីមានភាពងាយស្រួលចំពោះពពែនិងអ្នកចិញ្ចឹម។ ទ្រុងប្រភេទនេះបង្កលក្ខណៈល្អចំពោះសុខភាពសត្វ ដូច្នេះពពែនិងកូនរបស់វាមានសុខភាពល្អនិងធំធាត់លឿន។

កសិករគួរសង់ទ្រុងដោយមានការបែងចែក សំរាប់មេផើម មេបំបៅកូន សំរាប់ពពែបា និងសំរាប់ពពែជំទង់ ការធ្វើទ្រុងរបៀបនេះដើម្បីជៀសវាងនូវគ្រោះថ្នាក់ផ្សេងៗ ដូចជាការជល់គ្នា ឬជាន់កូនពពែងាប់ដែលបណ្តាលឲ្យខាតបង់ថវិកា។

ទំហំរបស់ទ្រុងត្រូវគណនាឲ្យសមស្របទៅនឹងចំនួនរបស់ពពែ ព្រោះបើទ្រុងតូចចង្អៀតវាបណ្តាលឲ្យប៉ះពាល់ដល់ការលូតលាស់របស់សត្វ។ទ្រុងគំរូសំរាប់សត្វពពែ ២២ក្បាល មានទំហំ ៣ម៉ែត្រ x​ ៥ម៉ែត្រ៖

  • ពពែញី ៦ក្បាល
  • ពពែឈ្មោល (បា) ១ក្បាល
  • កូនពពែ ១៥ក្បាល។

តារាងទី១. តំរូវការផ្ទៃក្រឡាទ្រុងសំរាប់ពពែ១ក្បាល

ប្រភេទពពែ ផ្ទៃក្រឡា (ម៉ែត្រការ៉េ) ១ក្បាល
កូនពពែ

ពពែជំទង់

ពពែញី

ពពែផើម

ពពែ​បំ​បៅកូន

ពពែបា

០,៥

១,២

១,៥

២-២,៥

២-២,៥

២-២,៨

ម២ = ម៉ែត្រក្រឡា

៤.៣. តើអ្នកត្រូវសង់ទ្រុងពពែនៅកន្លែងណ?

អ្នកគួរជ្រើសរើសទីកន្លែងសំរាប់សាងសង់ទ្រុងដោយយកចិត្តទុកដាក់ ទីកន្លែងសមស្របសំរាប់សង់ទ្រុងពពែ៖

  • ស្ងួត មិនដក់ទឹក
  • មានម្លប់ក្រោមដើមឈើ
  • មានខ្យល់ចេញចូលល្អ
  • ជៀសផុតពីទិសខ្យល់ខ្លាំង (ត្រជាក់ និងក្តៅ) និងភ្លៀង
  • ចែកឲ្យដាច់ពីហ្វូងគោ/ក្រោលគោ
  • យកល្អ ទ្រុងពពែត្រូវធ្វើចំងាយប្រហែល ១៨ម៉ែត្រពីកសិដ្ឋាន។

ត្រូវប្រុងប្រយ័ត្នចំពោះបន្ទះក្តារដែលយកមកក្រាលបាតទ្រុង៖

  • ចន្លោះរវាងបន្ទះក្តារតូចពេក គឺធ្វើឲ្យទ្រុងកខ្វក់ ពីព្រោះកាកសំណល់និងលាមកសត្វមិនអាចស្រក់ទៅដីបាន
  • ចន្លោះរវាងបន្ទះក្តារធំ គឺអាចធ្វើឲ្យរបួសក្រចកជើង និងជើងរបស់សត្វ។

អាស្រ័យហេតុនេះ

  1. ចន្លោះរវាងបន្ទះក្តារត្រូវគណនាឲ្យបានត្រឹមត្រូវ (០,៥-១សង់ទីម៉ែត្រ)
  2. បន្ទះក្តារត្រូវស្ងួត និងធន់គ្រប់រដូវ ដែលមិនធ្វើឲ្យវារីកមាឌ ឬរួញខ្លី។

ធ្នើរ ឬទ្រុងសំរាប់ដាក់ស្មៅ

  • ចំពោះទ្រុងដែលសង់ផុតពីដី គេអាចប្រើទ្រុងដាក់ស្មៅដែលភ្ជាប់ទៅនឹងជញ្ជាំង ទ្រុងប្រភេទនេះសំរាប់ដាក់ស្មៅ និងចំណីបៃតងផ្សេងទៀត ហើយដែលអាចកាត់បន្ថយនូវការខ្ជះខ្ជាយចំណី។
  • ប្រភេទធ្នើរ ឬទ្រុងសំរាប់ដាក់ចំណីផ្សេងទៀតដោយមិនចាំបាច់ភ្ជាប់ទៅនឹងជញ្ជាំង ដែលគេច្រើនប្រើ សំរាប់ទ្រុងសង់ផ្ទាល់ដី។

លាបពណ៌ទ្រុងដែលធ្វើហើយដោយប្រើប្រេងម៉ាស៊ីនដែលប្រើរួច ធ្វើយ៉ាងនេះដើម្បីការពារទ្រុងមិនឲ្យ​ឆាប់ពុក និងធ្វើឲ្យជាប់បានយូរ។ ទ្រុងកាន់តែជាប់បានយូរកាលណាគេថែរក្សា និងជួសជុលវា ម្យ៉ាងទៀត គេត្រូវលាបប្រេងម៉ាស៊ីនជារៀងរាល់ឆ្នាំ ហើយដំបូលដែលប្រក់ស្បូវត្រូវផ្លាស់ប្តូរវាទៀងទាត់ក្នុងរយៈពេល២ឆ្នាំម្តង។

ការដែលធ្វើទ្រុងបានល្អ អាចធ្វើឲ្យយើងមានសារៈប្រយោជន៍៖

  • កាត់បន្ថយនូវការស្លាប់របស់ពពែ និងកូនរបស់វា ដែលមិនធ្វើឲ្យខាតបង់ថវិកាច្រើន
  • ការពារជំងឺ និងកាត់បន្ថយការព្យាបាលផ្សេងៗ
  • ធ្វើឲ្យសត្វមានសុខភាពល្អ បង្កើនការលូតលាស់ធំធាត់របស់សត្វ។

ទាំងនេះជាលទ្ធផលដែលធ្វើឲ្យផលិតកម្មពពែទទួលបាននូវប្រាក់ចំណេញច្រើន។

ប្រភព សៀវភៅ ការចិញ្ចឹមពពែជាលក្ខណៈគ្រួសារនៅកម្ពុជា (អង្គការសេដាក)

សហគមន៍សម្បូរសប្បាយ

 

ប្រភព៖ សហគមន៍សម្បូរសប្បាយ (ស៣)