តាំងពិព័រណ៍ពាណិជ្ជកម្មថៃ «ថប់ថៃប្រែន ឆ្នាំ២០១៩» នៅកោះពេជ្រ

តាមប្រភពព័ត៌មានពីវេបសាយ (គេហទំព័រ) ក្រសួងពាណិជ្ជកម្ម បានឲ្យដឹងថា នៅមជ្ឈមណ្ឌលពិព័រណ៍ និងសន្និសីទកោះពេជ្រ មានរៀបចំពិធីតាំងពិព័រណ៍​ពាណិជ្ជកម្មថៃ ថប់ថៃប្រែន ឆ្នាំ២០១៩ ចាប់ពី​ថ្ងៃទី៣១ ខែ​មករា ដល់ថ្ងៃទី៣ ខែកុម្ភៈ ឆ្នាំ២០១៩។

នៅក្នុង​ឱកាសសម្ពោធការតាំងពិព័រណ៍នោះ​ ឯកឧត្តម ឈួន ដារ៉ា រដ្ឋលេខាធិការក្រសួងពាណិជ្ជកម្មកម្ពុជាបានគូសបញ្ជាក់ថា ពិព័រណ៍ពាណិជ្ជកម្មថៃ «ថប់ថៃប្រែន ឆ្នាំ២០១៩» បានបង្ហាញ​ពីសក្តានុពលពាណិជ្ជកម្ម និងមានបង្កប់នូវអត្ថន័យផ្នែកវប្បធម៌ និងប្រពៃណី​ ដើម្បី​ផ្សារភ្ជាប់សង្គម​ រវាងប្រជាជន​នៃប្រទេសទាំងពីរ​ ឱ្យកាន់តែស្អិតរមួត។

ឯកឧត្តម ឈួន ដារ៉ា បានអំពាវនាវដល់វិនិយោគិនបរទេស ជាពិសេសធុរជនថៃ ឱ្យចូលមកបណ្តាក់ទុនថែមទៀតនៅកម្ពុជា ដោយសារតែរាជរដ្ឋាភិបាល បានដាក់ចេញនូវកម្មវិធីកំណែទម្រង់ស៊ីជម្រៅ​ ដើម្បី​លើកកម្ពស់​បរិយាកាសវិនិយោគ និងកិច្ចសម្រួលពាណិជ្ជ​កម្ម​ ​សំដៅពង្រឹងឯករាជ្យភាព និងឧត្តមភាពប្រកួតប្រជែងរបស់កម្ពុជា នៅលើឆាកអន្តរជាតិ។

ទន្ទឹម​គ្នា​នោះ​ដែរ​ លោកជំទាវ Chutima Bunyapraphasara អនុរដ្ឋមន្រ្តីក្រសួងពាណិជ្ជកម្មថៃឡងដ៍៏បានបង្ហាញ​ជំនឿថា តាមរយៈព្រឹត្តិ​ការណ៍ពិព័រណ៍នេះ​ មិនត្រឹមតែជួយបង្កើនទំហំពាណិជ្ជកម្មរវាងប្រទេសទាំងពីរប៉ុណ្ណោះទេ ប៉ុន្តែ​ថែមទាំងរួមចំណែកលើកស្ទួយវិស័យទេសចរណ៍​ និងសេដ្ឋកិច្ចផងដែរ។

ព្រឹត្តិ​ការណ៍ពិព័រណ៍ពាណិជ្ជកម្មចំនួន៤ថ្ងៃនេះ ត្រូវបានរៀបចំឡើងដោយរាជរដ្ឋាភិបាលថៃ ក្នុងគោលបំណងណែនាំ​ និងបង្ហាញផលិត​ផល​ថៃ​ដែលមានគុណភាពខ្ពស់​ ដល់ប្រជាពលរដ្ឋកម្ពុជា​ ព្រម​ទាំង​ដើម្បី​ពង្រឹងទំនាក់ទំនងពាណិជ្ជ​កម្ម​ទ្វេ​ភាគី​ រវាងប្រទេសថៃ និងប្រទេសកម្ពុជា៕

សហគមន៍សម្បូរសប្បាយ

Source: Sambo Sabay News